អ្នកសម្រកទម្ងន់ទាំងឡាយ អាចចាញ់នឹងចិត្តរបស់ខ្លួនឯង ដោយទទួលទានអាហារឆ្ងាញ់ៗរហូតភ្លេចខ្លួន។ តែបើហេតុការណ៍នោះ កើតឡើងចំពោះអ្នក ត្រូវប្រញាប់ស្ដារស្ថានការណ៍ ដោយវិធីងាយៗដូចខាងក្រោមនេះ ទើបអាចជួយអ្នកបាន :
1. ស្ងប់ចិត្ត និងមិនតក់ស្លុត ៖
ភាពតានតឹងអាចធ្វើឲ្យរាងកាយ ប្រមូលផ្ដុំជាតិខ្លាញ់ក្បាលពោះច្រើនឡើង។ បើអ្នកកាន់តែមានអារម្មណ៍ខុសជាមួយនឹងទង្វើរបស់ខ្លួន ភាពធាត់ក៏នឹងដុះដាលកាន់តែឆាប់រហ័ស។ ប៉ុន្តែសូមគិតថា អតីតកាល គឺជាអ្វីដែលកន្លងហួសទៅហើយ កុំគិតច្រើន ពេលនោះទម្ងន់ខ្លួនរបស់អ្នក នឹងមិនសូវកើនឡើងច្រើនឡើយ។
2. ពេលទទួលទានថែម ត្រូវតែហាត់ប្រាណថែម ៖
បន្ទាប់ពីទទួលបានកាឡូរីច្រើនហើយ នៅថ្ងៃនោះ អ្នកគួរហាត់ប្រាណថែម ១៥នាទី ឬដើរឡើងចុះជណ្ដើរ យ៉ាងតិច ២ ទៅ៣ ជុំ ពេលនោះ អ្វីដែលអ្នកទទួលទានចូល នឹងត្រូវបានបង្ក្រាបអស់ទៅវិញផងដែរ។
3. អាហារកាកសរសៃខ្ពស់ និងទឹកស្អាត ៖
អាហារដែលមានកាកសរសៃខ្ពស់ ដែលមានដូចជា បន្លែបៃតង, ខាត់ណា, ការ៉ុត, ផ្លែប៉ោម, ផ្លែគីវី, ផ្លែក្រូច អាចជួយឲ្យជាតិខ្លាញ់ប្រមូលផ្ដុំ រលាយយ៉ាងលឿន ហើយថែមទាំងកាត់បន្ថយអាការហើមខ្លួន ទល់លាមក ដែលបណ្ដាលមកពីចំណីកំដរមាត់ទាំងនោះបាន។ ម្យ៉ាងទៀត ចំពោះទឹកស្អាត បើសិនជាថ្ងៃនេះ អ្នកទទួលទានច្រើន នៅថ្ងៃបន្ទាប់ គួរផឹកទឹកជារឿយៗ ឲ្យបានពី ៨ ទៅ១០ កែវ ដើម្បីជម្រុញប្រព័ន្ធដុតបំផ្លាញថាមពល និងបណ្ដេញសូដ្យូម ចេញពីរាងកាយ មុននឹងខ្លួនហើម។
