កម្ពុជានាំចូលបន្លែពីប្រទេសជិតខាងជាង៥០%ដោយគ្មានពិនិត្យលើផ្នែកគុណភាព និងសុខភាពនៅតាមព្រំដែន
(ភ្នំពេញ) ៖ ប្រទេសកម្ពុជាបាននាំចូលបន្លែពីប្រទេសជិតខាង គិតជាទឹកប្រាក់ប្រហែល២០០លានដុល្លារអាមេរិកជារៀងរាល់ឆ្នាំ ដើម្បីបង្គ្រប់ការផ្គត់ផ្គង់ក្នុងស្រុក ដែលមានតម្រូវការប្រចាំថ្ងៃប្រមាណជាង៤០០តោន។
របាយការណ៍ពីមជ្ឈមណ្ឌលសិក្សាគោលនយោបាយ បានឱ្យដឹងថា យ៉ាងហោចណាស់បន្លែជាង១៤ម៉ឺនតោនត្រូវបាននាំយកពីប្រទេសវៀតណាមមកកាន់ប្រទេសកម្ពុជាជារៀងរាល់ឆ្នាំ។ បរិមាណនាំចូលនេះបើគិតជាទឹកប្រាក់ប្រមាណជាង២០០លានដុល្លារអាម៉េរិក។
ដោយឡែកតាមរបាយការណ៍ របស់ជំនាញផ្នែកត្រួតពិនិត្យគុណភាពផលិតផលកសិកម្មនៃអង្គការGIZប្រទេសអាល្លឺម៉ង់បានរកឃើញថា ប្រទេសកម្ពុជា បាននាំចូលបន្លែពីប្រទេសវៀតណាម និងថៃ ជាង៥០ភាគរយ។បន្លែទាំងនោះមិនត្រូវបានពិនិត្យលើផ្នែកគុណភាព និងសុខភាពនៅតាមព្រំដែនមុននឹងធ្វើការនាំចូលនោះទេ។ បន្លែដែលនាំចូល ចន្លោះពី២០០ទៅ៣០០តោនក្នុងមួយថ្ងៃៗ ជារឿយៗ តែងភ្ជាប់ជាមួយនូវសារធាតុពុល។
រាជរដ្ឋាភិបាលកម្ពុជាបានបម្រុងថវិកា២០លានដុល្លារអាមេរិកដើម្បីជំរុញផលិតកម្មស្រូវ និងបន្លែសម្រាប់ឆ្នាំ២០១៦-២០១៨ សំដៅកាត់បន្ថយការនាំចូលពីបរទេស។ ក្នុងឆ្នាំ២០១៦នេះ រាជរដ្ឋាភិបាល ក៏បានស្នើសភាអនុម័តខ្ទង់ចំណាយទៅលើវិស័យកសិកម្មនូវថវិកាសរុបជាង៤៦លានដុល្លារអាម៉េរិក ឱ្យទៅក្រសួងកសិកម្ម រុក្ខាប្រមាញ់ និងនេសាទដើម្បីជំរុញផលិតកម្មស្បៀងឱ្យបានក្នុងរង្វង់៥ភាគរយ ក្នុងមួយឆ្នាំ។
ជាមួយគ្នានេះដែរ លោក ហ៊ាន វណ្ណហន អគ្គនាយករងនៃអគ្គនាយកដ្ឋានកសិកម្ម ធ្លាប់បានឱ្យដឹង ថា ផ្នែកជំនាញរបស់រាជរដ្ឋាភិបាលកំពុងធ្វើកិច្ចការកំណត់ស្តង់ដារបន្លែសរីរាង្គជាមួយមន្ត្រីកសិកម្មនៅក្នុងប្រទេសសមាជិកសមាគមអាស៊ានទាំង១០ប្រទេស ដែលនឹងបានជាប្រយោជន៍ដល់កសិករដាំដំណាំសរីរាង្គនៅទូទាំងសមាគមអាស៊ាន។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងឆ្នាំកន្លងទៅផ្ទៃដីដាំដុះដំណាំបន្លែមានជាង៥ម៉ឺនហិកតា ហើយទទួលបានទិន្នផលជិត៤សែនតោន ក្នុងនោះខេត្តមានសក្តានុពលដាំដុះខ្លាំងមាន ខេត្តកំពង់ចាម តាកែវ កំពង់ឆ្នាំង កំពង់ស្ពឺ និងកណ្តាល៕
