អ្នកណាមិនដឹងថា ជប៉ុនជាប្រទេសមុខនាំគេបំផុតមួយ ក្នុងពិភពលោក ខាងការផលិតភាពយន្តអាសអាភាស រហូតដល់ថ្នាក់នាំចេញទៅក្រៅប្រទេសរាប់ពាន់រឿង។ ជាមួយគ្នានេះ ទៀតសោត វិស័យភាពយន្តនេះក៏ត្រូវបានប្រទេសជប៉ុន ចាត់ថាទុកជាវិស័យដែលរកលុយស្រួលជាងគេផងដែរ។
ភាពយន្តអាសអាភាសមួយរឿងៗ អាចឲ្យជប៉ុនរកលុយដល់ទៅរាប់សែនរាប់លានដុល្លារ ព្រោះមានអ្នកគាំទ្ររាប់លាននាក់នៅជុំវិញពិភពលោក។ ប៉ុន្តែតាមពិត ហេតុផលសំខាន់នៃការផលិតខ្សែភាពយន្តនេះ គឺមិនផ្ដោតសំខាន់លើលុយតែម៉្យាងឡើយ។
យោងតាមសមាគមថ្នាក់ជាតិមួយឈ្មោះ គម្រោងគ្រួសារជប៉ុន (Japanese Family Planning Association) បានបញ្ចេញរបាយការណ៍មួយកាលពីពេលថ្មីៗនេះបង្ហាញថា ការពង្រឹងវិស័យភាពយន្តសិចរបស់ជប៉ុនមិនមែនផ្ដោតសំខាន់តែទៅលើលុយប៉ុណ្ណោះ ប៉ុន្តែវាពាក់ព័ន្ធយ៉ាងខ្លាំងទៅនឹងទំនោររួមភេទរបស់ប្រជាជននេះផងដែរ។
សមាគម Japanese Family Planning បានឲ្យដឹងថា ក្នុងរយៈពេលនៃការសិក្សារបស់ខ្លួនជាង១ឆ្នាំ ដោយសម្ភាសន៍មនុស្សជាង៣,០០០នាក់ បានរកឃើញថា ចំនួនដល់ទៅ៤៩.៣ភាគរយ នៃប្រជាជនសរុបរបស់ជប៉ុន គ្មានទំនោរ ឬមិនមានអារម្មណ៍ក្នុងការរួមភេទទាល់តែសោះ ដែលនេះជាចំនួនដ៏ច្រើនដល់ទៅជិត៥០%នៃប្រជាជនទៅហើយ។
