តើការងូតទឹកក្តៅមានអត្ថប្រយោជន៍អ្វីខ្លះដល់សុខភាព?
១- ទឹកក្តៅជួយលាងសំអាតស្បែកបានល្អ
ក្នុង១ថ្ងៃៗ មានលំអងធូលីនិងជាតិពុលមិនស្អាតជាច្រើនមកប៉ះរាងកាយរបស់យើង មកបិទរន្ធញើស បង្កទៅជាមុន ឬអាចម៍រុយនៅលើស្បែក។ ការងូតទឹកក្តៅ ដែលធ្វើឱ្យរន្ធញើសរីកធំឡើង អាចជួយលាងសំអាតភាពកក្វក់ទាំងអស់នេះបានយ៉ាងល្អប្រសើរ។
២- ទឹកក្តៅជម្រុញឱ្យបង្កើត Heat Stress Proteins (HSPs)
HSPs គឺជាប្រូតេអ៊ីនដែលលេចចេញមកនៅពេលណាដែលយើងកើតមានស្ត្រេសណាមួយ ហើយជួយយើងឱ្យការពារនឹងស្ត្រេសនោះនៅពេលក្រោយបើសិនជាកើតមានម្តងទៀត។ ការងូតទឹកក្តៅរាល់ៗថ្ងៃជួយធ្វើឱ្យ HSPs កើនឡើង ម្ល៉ោះហើយក៏ធ្វើឱ្យរាងកាយរឹងមាំឡើងផងដែរ។
៣- ទឹកក្តៅធ្វើឱ្យអារម្មណ៍បានធូរស្បើយ
ជួនកាលយើងហាក់ដូចជាមានការតានតឹងក្នុងអារម្មណ៍ ដោយមកពីធ្វើការច្រើនពេញមួយថ្ងៃ មានការរំខានពីអ្នកដទៃ ឬមានស្ត្រេសជាមួយនឹងការរៀននៅសាលា។ ការងូតទឹកក្តៅអាចជួយធ្វើឱ្យយើងមានការធូរស្បើយបាន។
៤- ទឹកក្តៅជួយឱ្យបាត់ឈឺសាច់ដុំ និងឆាប់សះជាពីជម្ងឺបាន
បន្ទាប់ពីបញ្ចេញកម្លាំងកាយខ្លាំង ដូចជារត់ប្រណាំងគ្នា ដើរឆ្ងាយ ឬធ្វើពលកម្មច្រើន សាច់ដុំរបស់យើងត្រូវការការជួសជុលឡើងវិញ។ នៅពេលដែលការដេកគឺជាឱកាសសម្រាប់ការជួសជុលទាំងនេះ ការងូតទឹកក្តៅក៏អាចជួយបានដែរ តាមរយៈការជំរុញល្បឿនមេតាបូលិស។
៥- ទឹកក្តៅជួយកសាងរាងកាយឱ្យរឹងមាំ
យើងបានឃើញនៅខាងលើរួចហើយ ថាការងូតទឹកក្តៅធ្វើឱ្យមានការបង្កើត HSPs កាន់តែច្រើន ដែលធ្វើឱ្យរាងកាយធន់ជាមួយនឹងស្ត្រេសបាន រួមទាំងការហាត់ប្រាណផ្សេងៗផងដែរ។ ម្យ៉ាងទៀត HSPs ជួយដល់ការធ្វើមេតាបូលិសថែមទៀត។ ដោយហេតុនោះ វាធ្វើឱ្យរាងកាយយើងកាន់តែរឹងមាំ សរុបសេចក្តីមក ការងូតទឹកក្តៅ៖
- ជួយសំអាតរន្ធញើស និងស្បែក
- ធ្វើឱ្យរាងកាយធន់នឹងស្ត្រេស
- ជួយឱ្យបានធូរស្បើយ
- ជួយបំបាត់ការឈឺចាប់សាច់ដុំ
- ធ្វើឱ្យរាងកាយរឹងមាំ។
