វាដូចជាមិនត្រូវការឱ្យអ្នករង់ចាំរយៈពេលយូរដើម្បីទទួលបានសក់ដុះលឿន និងភ្លឺរលោងទៅតាមក្តីស្រមៃទៀតទេ។ ការញ៉ាំអាហារទាំងឡាយណាដែលអាចជំរុញដល់ការលូតលាស់សក់ និងសុខភាពសក់អាចជួយបង្កើនល្បឿនរបស់វាបានយ៉ាងល្អ នេះដោយសារតែជីវជាតិរបស់វាតែម្តង។ ដូច្នេះហើយ ចូរញ៉ាំអាហារខាងក្រោមនេះដើម្បីទទួលបានការលូតលាស់សក់ទៅតាមក្តីស្រមៃរបស់អ្នក។
ត្រីសាល់ម៉ុង
ខ្លាញ់អាស៊ីតអូមេហ្គាបីសម្បូរជាងគេក្នុងត្រីសាលម៉ុង និងអាចជួយថែរក្សាសុខភាពស្បែកក្បាល ព្រមទាំងជំនួយដល់ការលូតលាស់សក់ទៀតផង។ ត្រីនេះក៏មានវីតាមីន D និងអាស៊ីតអាមីណេ ដែលវាសុទ្ធសឹងតែសំខាន់ចំពោះសុខភាពសក់ដែរ។
ផ្លែបឺរ
ជាតិខ្លាញ់ដ៏ច្រើនរបស់ផ្លែបឺរមានសារៈសំខាន់ណាស់ក្នុងការជួយឱ្យសក់លូតលាស់វែង និងភ្លឺរលោង។ ខ្លាញ់មួយចំនួនក្នុងផ្លែនេះក៏ជាប្រភេទអូមេហ្គាបី សម្រាប់ស្បែកក្បាលដ៏មានសុខភាពល្អដែរ។ ក្រៅពីញ៉ាំ អ្នកក៏អាចប្រើផ្លែនេះលាបលើសក់ និងស្បែកក្បាលដោយផ្ទាល់ដើម្បីភ្ញោចដល់ការផលិតកូឡាជែន និងអេឡាស្ទីន ដែលវាជាប្រូតេអ៊ីនដ៏សំខាន់សម្រាប់ស្បែក និងរចនាសម្ព័ន្ធស្បែកក្បាលតែម្តង។
ស៊ុតពណ៌ស
ស៊ុតពណ៌សមានខ្លាញ់អាស៊ីតអូមេហ្គាបី និងBiotin ខ្ពស់ ដែលអាចជួយឱ្យសក់លូតវែង និងមានសុខភាពល្អ។ មិនត្រូវញ៉ាំស៊ុតបែបនេះច្រើនពេកទេ ព្រោះវាអាចនាំឱ្យរាំងស្ទះដល់ការបឺតស្រូបសារធាតុ Biotin បាន។
ផ្លែអាល់ម៉ុន
វាក៏ដូចជាស៊ុតពណ៌សដែរ គឺមានជាតិ Biotin។ ការញ៉ាំផ្លែអាល់ម៉ុនមួយពែងជាទៀងទាត់ប្រហែលជាអាចជួយឱ្យសក់លូតវែង និងក្រាស់បាន។
គ្រាប់ផ្កាឈូករ័ត្ន
អ្នកជំនាញខាងអាហារូបត្ថម្ភជាច្រើននិយាយថា វីតាមីន E ដែលមានក្នុងផ្កាឈូករ័ត្នមិនត្រឹមតែជួយឱ្យសក់លូតលាស់ទេ តែក៏ល្អចំពោះសុខភាពសរសៃសក់ដែរ។ អង់ទីអុកស៊ីដង់មួយនេះក៏ជួយបង្ការការជ្រុះសក់ដែរ ព្រោះវាអាចជួយស្បែកក្បាលស្ថិតក្នុងសភាពសុខភាពល្អបានយូរបំផុត។
ដំឡូងជ្វា
សារធាតុ Beta Carotene ក្នុងដំឡូងជ្វាគឺជារបស់ដ៏សំខាន់សម្រាប់បឺតស្រូបវីតាមីន A ដែលវាល្អសម្រាប់លូតលាស់សក់ផង និងសុខភាពស្បែកក្បាលផង។
ម្ទេសប្លោកពណ៌លឿង
បើយើងប្រៀបធៀបនឹងផ្លែក្រូចវិញ គឺថាម្ទេសប្លោកពណ៌លឿងមានវីតាមីនC ច្រើនជាងក្រូចរហូតដល់ ៥ដងឯណោះ ដែលវាមានសារៈសំខាន់សម្រាប់ពង្រឹងទាំងសរសៃសក់ និងឫសសក់។ ក្រៅពីនេះការខូចសរសៃសក់ក៏មិនសូវកើតមានដែរ នេះដោយសារតែអង់ទីអុកស៊ីដង់របស់បន្លែងនេះតែ ម្តង។
អយស្ទើ
កង្វះជាតិស័ង្គសីត្រូវបានគេស្គាល់ថានាំឱ្យជ្រុះសក់។ ដូច្នេះចូរប្រាកដថា រាងកាយអ្នកមានជាតិស័ង្គសីទៅតាមតម្រូវការអស់ហើយតាមរយៈការញ៉ាំអយស្ទើ៕
