កម្ចាត់ក្លៀកខ្មៅឲ្យប្រែជាស ១០០
តើអ្នកចង់ឲ្យក្លៀកខ្មៅប្រែជាសតាមបែបធម្មជាតិដែរទេ? អ្នកជំនាញបានណែនាំថា ផ្លែឈើ និងបន្លៃជាសមាសធាតុផ្សំដ៏ប្រសើរបំផុត ប្រើលើស្បែកដើម្បីជម្រះតំបន់ស្បែកខ្មៅ។ ប្រភេទផ្លែឈើដូចជា ក្រូចឆ្មា, ប៉េងប៉ោះ និងត្រសក់មានផ្ទុកនូវបរិមាណវីតាមីន C ដែលធ្វើឲ្យស្បែករបស់អ្នកស្រស់ស្អាត។
ម្យ៉ាងវិញទៀត ប៉េងប៉ោះជាប្រភេទបន្លែដែើអាចជួយឲ្យស្បែកខ្មៅប្រែជាសនៅពេលប្រើវាលាបដោយផ្ទាល់លើស្បែកក្លៀក។ ការប្រើផ្លែឈើ និងបន្លែឲ្យបាន ២ដងក្នុង ១ខែ នឹងមិនប៉ះពាល់អាក្រក់លើស្បែក តែថែមទាំងជួយកម្ចាត់បញ្ហាស្បែកបានយ៉ាងល្អទៀតផង។
តែទោះបីជាយ៉ាងណាក៏ដោយ អ្នកជំនាញបាននិយាយថា ត្រូវឲ្យមានភាពប្រុងប្រយ័ត្នចំពោះស្បែក ក្រោយពេលប្រើប្រាស់ឱសថទាំងនេះលើក្លៀករួច។ មិនត្រូវកោររោមក្លៀកក្រោយពេលលាបសមាសធាតុផ្សំពីធម្មជាតិរួចឡើយ។
មិនត្រូវបាញ់ទឹកអប់ ឬស្ព្រាយ៏លើក្លៀកក្រោយពេលប្រើឱសថធម្មជាតិរួច។ ហើយក៏កុំភ្លេចងូតទឹកក្តៅឧណ្ឌៗ និងមិនត្រូវពាក់អាវតឹងពេក ព្រោះវានឹងបណ្តាលឲ្យរលាកក្លៀក។
បន្ទាប់ពីបានអនុវត្តវិធីសាស្ត្រខាងលើ ក្លៀករបស់អ្នកនឹងទន់ ហើយសស្រស់ស្អាត។ ដូច្នេះ តើអ្នកនៅចាំអីទៀត? ខាងក្រោមនេះជាប្រភេទផ្លែឈើ និងបន្លែដែលអាចលាបលើក្លៀក ដើម្បីកម្ចាត់ស្បែកខ្មៅ៖
ក្រូចឆ្មា
ក្រូចឆ្មាជាផ្លែឈើដ៏មានប្រសិទ្ធិភាពមួយប្រភេទដែលអាចជួយឲ្យស្បែកសបានឆាប់រហ័ស។ ហាន់ក្រូចឆ្មាស្រស់ពាក់កណ្តាល រួចម៉ាស្សាដោយធ្វើចលនាជារង្វង់លើក្លៀក។ រង់ចាំរហូតដល់ទឹកក្រូចស្ងួត ហើយធ្វើវាម្តងទៀត។ អនុវត្តវិធីនេះឲ្យបាន ២ដងក្នុង ១ខែ ដើម្បីធ្វើឲ្យស្បែកក្លៀកសស្រស់ស្អាត។
ត្រសក់
ប្រើទឹកត្រសក់ម៉ាស្សាលើក្លៀក។ ដាក់ទឹកត្រសក់ក្លាសេឲ្យត្រជាក់ រួចលាយជាមួយនឹងទឹកដោះគោជូរបន្តិច ហើយលាបលើក្លៀក។ ក្រោយរយៈពេល ១៥នាទី លាងសម្អាតក្លៀកចេញដោយទឹកត្រជាក់។
ដំឡូងបារាំង
ចម្រាញ់យកទឹកពីដំឡូងបារាំងដោយកិនដំឡូងឲ្យម៉ត់។ លាបទឹកវាលើក្លៀក ហើយរង់ចាំរហូតដល់ស្ងួតរយៈពេល ១៥នាទី។ នៅពេលវាស្ងួត ជូតសមាសធាតុចេញពីក្លៀកដោយប្រើកន្សែងពោះគោសើម ហើយទន់។ លាងសម្អាតក្លៀកដោយទឹកត្រជាក់ និងអនុវត្តម្តងទៀតក្រោយរយៈពេល ១៥ថ្ងៃ។
សំបកក្រូច
កិនសំបកក្រូចឆ្មាឲ្យម៉ត់។ បន្ថែមទឹកក្រូចឆ្មា ៣ស្លាបព្រាបាយចូល។ លាបវាលើក្លៀក ដើម្បីកម្ចាត់បញ្ហាស្បែកខ្មៅយ៉ាងមានប្រសិទ្ធិភាព។
ផ្លែប៉ោម
ទឹកផ្លែប៉ោមជាសមាសធាតុផ្សំដ៏អស្ចារ្យ ជួយកម្ចាត់បញ្ហាក្លៀកខ្មៅ។ វត្តមាននៃប្រូតេអ៊ីន និងវីតាមីននៅក្នុងផ្លែប៉ោមអាចធ្វើឲ្យស្បែករបស់អ្នកសស្រស់ស្អាតបានយ៉ាងឆាប់រហ័ស។
ប៉េងប៉ោះ
កិនប៉េងប៉ោះឲ្យម៉ត់។ លាបទឹកប៉េងប៉ោះលើក្លៀកខ្មៅ។ រង់ចាំរហូតដល់វាស្ងួត បន្ទាប់មកលាបទឹកប៉េងប៉ោះថែម។ ទឹកបន្លែនេះមានប្រសិទ្ធិភាពក្នុងការព្យាបាលបញ្ហាក្លៀកខ្មៅ។
ម្នាស់
ប្រើដុំម្នាស់ម៉ាស្សាលើក្លៀករយៈពេល ១០នាទី។ នៅពេលទឹកម្នាស់ស្ងួត ជូតក្លៀកចេញដោយប្រើក្រណាត់ស្បៃត្រាំទឹកដោះគោ។ សមាសធាតុទាំងពីរនេះនឹងជួយកម្ចាត់បញ្ហាក្លៀកខ្មៅក្នុងរយៈពេល ១សប្តាហ៏៕
