លោកកែម ឡី ជាអ្នកវិភាគសង្គមបានលើកឡើងនៅលើបណ្តាញទំនាក់ទំនងសង្គមFacebookផ្ទាល់ខ្លួនរបស់លោកថា ច្បាប់ព្រៃគឺជាច្បាប់ចេញពីមនុស្សព្រៃឬក្រុមមនុស្សព្រៃ។លោកបញ្ជាក់ថា ច្បាប់និងសេចក្តីសម្រេចទាំងឡាយនៃស្ថាប័ននានារបស់រដ្ឋដែលផ្ទុយរដ្ឋធម្មនុញ្ញគឺមិនមែនជាច្បាប់ទេឬជាច្បាប់ព្រៃដែលចេញពីមនុស្សព្រៃឬ
ក្រុមមនុស្សព្រៃតែប៉ុណ្ណោះ។ប្រសិនណាយើងអនុវត្តតាមច្បាប់ សេចក្តីសម្រេចឬបទបញ្ជាទាំងឡាយណាដែលផ្ទុយពីរដ្ឋធម្មនុញ្ញនោះគឺមានន័យថាយើងកំពុងតែអនុវត្តតាមមនុស្សព្រៃឬយើងកំពុងរួមគ្នារំលោភរដ្ឋធម្មនុញ្ញ។ នេះជាការលើកឡើងរបស់កែម ឡី។
លោកបញ្ជាក់ថារដ្ឋធម្មនុញ្ញជាច្បាប់កំពូល នៃព្រះរាជាណាចក្រកម្ពុជា។ ដូច្នេះច្បាប់និងសេចក្តីសម្រេចទាំងឡាយនៃស្ថាប័ននានារបស់រដ្ឋត្រូវស្របនឹងរដ្ឋធម្មនុញ្ញជាដាច់ខាត។
លោកកែម ឡីបានលើកឡើងទាក់ទងនឹងច្បាប់ការពារព្រៃឡង់ និងវិមជ្ឈការសិទ្ធិគ្រប់គ្រង ថែទាំ គាំពារ ចាត់ចែងទាំងស្រុងដល់សហគមន៍ព្រៃឡង់និងសហគមន៍ព្រៃឈើ ដោយមានការសហការយ៉ាងជិតស្និទ្ធិជាមួយក្រុមប្រឹក្សាឃុំ-សង្កាត់ទើបមានប្រសិទ្ធិភាព និងនិរន្តរភាព។ អាជ្ញាធរថ្នាក់កណ្តាល និងថ្នាក់ជាតិមានតួនាទីគ្រាន់តែជាអ្នកផ្តល់បច្ចេកទេស និងចលនាធនធានតែប៉ុណ្ណោះ។
លោកកែម ឡី ក៏បានអំពាវនាវផងដែរឲ្យជនរួមជាតិមេត្តាជួយលើកកម្ពស់ ការអនុវត្តន៍រដ្ឋធម្មនុញ្ញកម្ពុជា និង ជួយវិភាគច្បាប់ទាំងជាង៤០០និង គោលនយោបាយ សេចក្តីសម្រេច ឬបទបញ្ជាណាខ្លះដែលផ្ទុយនឹងរដ្ឋធម្មនុញ្ញ ដើម្បីជួយផ្សព្វផ្សាយជូនមហាជនបានជ្រាប។
