ជំងឺក្អកមានច្រើនប្រភេទណាស់មានក្អកស្ងួត, ក្អកស្លេស្ម, ក្អកស្រួចស្រាវ, ក្អករារ៉ៃ។ល។ ជំងឺក្អកខ្លះអាចខាកបញ្ចេញស្លេស្មដែលអាចជាបញ្ហាធ្ងន់ធ្ងរទៀតផង។ តាមរយៈរោគសញ្ញាទាំងនេះគេអាចធ្វើរោគវិនិច្ឆ័យដើម្បីឈានដល់ការព្យាបាលដ៏ត្រឹមត្រូវនិងសមស្របមួយ។
ឱសថប្រឆាំងក្អកស្ងួត ៖ វាត្រូវបានគេប្រើប្រាស់ដើម្បីព្យាបាលក្អកស្ងួតរមាស់ក។ វាអាចមានទំរង់ជាស៊ីរ៉ូ, គ្រាប់, ម្សៅ ឬជាស្ករទំពារ។ វាធ្វើសកម្មភាពនៅមជ្ឈមណ្ឌលកណ្តាលដោយបញ្ជារអោយមានការក្អកដែលធ្វើអោយការព្យាបាលមានប្រសិទ្ធភាពខ្ពស់ដើម្បីបំបាត់ក្អក។ ដូចនេះ ប្រសិនបើការប្រើប្រាស់ខុសទិសដៅដូចជាការប្រើប្រាស់វាសំរាប់ព្យាបាលក្អកស្លេស្មវានឹងផ្តល់ផលវិបាកកាន់តែធ្ងន់ធ្ងរដោយវាធ្វើអោយការបញ្ចេញស្លេស្មកាន់តែខ្លាំងនិងធ្វើអោយស្ទះតាមទងសួត។ ការលំបាកគឺការជ្រើសរើសឱសថបំបាត់ក្អកស្ងួតណាមួយដែលយើងស្គាល់ច្បាស់ពីធាតុសកម្មមកធ្វើការព្យាបាល។ ដូចនេះ ដើម្បីជ្រើសរើសឱសថអោយបានត្រឹមត្រូវ យើងត្រូវ៖
អានអោយច្បាស់ពីសមាសធាតុផ្សំសកម្ម និងការណែនាំប្រើ
មិនត្រូវប្រើរួមគ្នារវាងឱសថដែលមានធាតុផ្សំសកម្មសំរាប់ព្យាបាលក្អកស្ងួតជាមួយឱសថពង្រាវស្លេស្មព្រោះវាធ្វើអោយក្អកកាន់តែខ្លាំង
ត្រូវដឹងពីឱសថដែលមិនគួរប្រើជាមួយឱសថទាំងនេះ
ចំពោះការព្យាបាលដែលប្រើឱសថដោយខ្លួនឯងគឺមិនត្រូវអោយឱសថដែលយើងប្រើទៅព្យាបាលអ្នកផ្សេងនោះទេ។
ឱសថនេះមិនត្រូវប្រើលើស៣ទៅ៥ថ្ងៃទេ, មិនត្រូវប្រើពេលមានក្អកស្លេស្ម, មិនត្រូវញុំាស្រា, បើក្អកនៅតែបន្ត ត្រូវទៅជួបវេជ្ជបណ្ឌិត។
ប្រភេទឱសថដែលគេប្រើសំរាប់ព្យាបាលក្អកស្ងួតមាន៖
ឱសថបំបាត់ក្អកដែលមានជាតិអាភៀន ៖ ដូចជា codeine, codethyline, pholcodine, dextromethorphane, noscapineវាមានប្រសិទ្ធភាពខ្ពស់តែត្រូវប្រើដោយប្រុងប្រយ័ត្នដោយសារវាមានផលរំខានច្រើនដូចជាមានផលវិបាកក្នុងការរំលាយអាហារ, ថប់ដង្ហើមពេលប្រើលើសកម្រិត, ងងុយដេកនិងអាចបណ្តាលអោយយើងញៀនពេលប្រើយូរ។មិនត្រូវប្រើពេលមានជំងឺហឺត,មានបញ្ហាថប់ដង្ហើម,ទារក,ស្ត្រីមានផ្ទៃពោះ,បំបៅដោះកូន។ប្រើដោយប្រុងប្រយ័ត្នចំពោះអ្នកបើកបរនិងមនុស្សចាស់។
ឱសថបំបាត់ក្អកប្រភេទអង់ទីអ៊ីស្តាមីន ៖ ដូចជា Alimemazine, promethazine ហាមប្រើចំពោះអ្នកបើកបរ, អ្នកមានបញ្ហាភ្លេចភ្លាំងច្រើន, ក្មេងអាយុក្រោម១ឆ្នាំ, អ្នកមានជំងឺថប់ដង្ហើម និងអ្នកមានផ្ទៃពោះ។
ឱសថបំបាត់ក្អកផ្សេងៗ ៖ zipeprole, eprazinone, oxeladine, clobutinol វាមានប្រសិទ្ធឆាប់រហ័សតែមានផលវិបាកច្រើនដូចជាងងុយដេក, វិលមុខ, ញៀន, ប្រកាច់... ឱសថនេះហាមប្រើស្ត្រីមានផ្ទៃពោះត្រីមាសទី១។
ឱសថដែលបានរៀបរាប់ខាងលើសុទ្ធតែមានប្រសិទ្ធភាពព្យាបាលក្អកស្ងួត។ ដើម្បីអោយការប្រើប្រាស់កាន់តែមានប្រសិទ្ធភាព និងសុវត្ថិភាព សូមធ្វើការជ្រើសរើសឱសថទាំងនេះតាមឱសថស្ថានដែលស្របច្បាប់ និងផ្តល់ការប្រឹក្សាដ៏ត្រឹមត្រូវ។
ព័ត៌មានបន្ថែម សូមចូលទៅកាន់តណភ្ជាប់នេះ http://on.fb.me/1jSExai
